خاتون کو سر عام چھری کے 15 سے زائد وار کر کے قتل کرنے والا ملزم گرفتار

Source: ARYNews.tv | Urdu - Har Lamha Bakhabar
Author: افضل خان

کراچی: شہر قائد کے علاقے مانسہرہ کالونی میں ایک خاتون کو سر عام چھری کے وار کر کے قتل کرنے والا سفاک ملزم گرفتار کر لیا گیا۔

اے آر وائی نیوز کے مطابق پولیس نے کراچی کے علاقے مانسہرہ کالونی میں قبرستان کے نزدیک 36 سالہ زہرہ کو سر عام چھری کے وار کر کے قتل کرنے والے ملزم محمد ابراہیم کو گرفتار کر لیا ہے۔

قتل کا یہ واقعہ 26 اپریل کو صبح کے وقت پیش آیا تھا، جب خاتون زہرہ کام پر جانے کے لیے گھر سے نکلی تھی، قتل کا مقدمہ شرافی گوٹھ پولیس اسٹیشن میں درج ہوا تھا، ایف آئی آر کے مطابق ملزم ابراہیم نے خاتون پر چھری کے 15 سے 18 وار کیے تھے۔

ملزم ابراہیم واقعے کے روز ہی سے مفرور ہو گیا تھا، ایس ایس پی طارق الہٰی مستوئی کے مطابق انویسٹیگیشن پولیس کے ساتھ مل کر تیکنیکی مدد سے ملزم کو گرفتار کیا گیا۔

مقدمے کے مطابق مقتولہ خاتون ملزم ابراہیم کی سابقہ بیوی تھی، جس نے انھیں 6 سال قبل طلاق دے دی تھی، اور ابھی ایک سال قبل خاتون نے فیکٹری مزدور محمد صدیق سے شادی کی تھی۔

پولیس حکام کے مطابق گرفتار ملزم نے ذاتی رنجش پر سابقہ بیوی کے قتل کا اعتراف کر لیا ہے، ملزم کو عدالت میں پیش کر کے مزید تفتیش کے لیے ریمانڈ حاصل کیا جائے گا۔